ВКД: Ду савдогар на барои риш, балки бо гумони шомил гардидан ба ҳаракатҳои террористӣ дастгир шудаанд

Душанбе, 23.02.2016.(АМИТ «Ховар»).-Вазорати корҳои дохилии Ҷумҳурии Тоҷикистон дар робита ба хабари сомонаҳои интернетӣ оид ба он, ки гӯё дар бозори «Корвон» ду савдогарро кормандони милитсия барои риш доштан боздошт намуда, ба ВКД бурдаанд, иттилоъ медиҳад, ки ин нафарон аъзои ташкилоти террористию экстремистӣ буда, мақсадашон ноором сохтани вазъи сиёсӣ дар ҷумҳурӣ мебошад.
Хабари мазкур бидуни таҳлилу муайян кардани сабаби боздошти ду нафар носанҷида ба табъ расонида шудааст. Бояд тазаккур дод, ки мақомоти корҳои дохилӣ танҳо нисбат ба афроде, ки даст ба ҷиноят зада, бо амалу кирдори худ хатар ба ҷомеа эҷод мекунанд, сару кор мегирад.
Ин шаҳрвандон на барои риш мондан, балки бо гумони шомил гардидан ба ҳизбу ҳаракатҳои ғайриқонунии террористию экстремистӣ дар бозори «Корвон» дастгир шудаанд.