Задухӯрди мусаллаҳона дар сарҳад

Душанбе, 15.02.2016. (АМИТ «Ховар»). -13 январи соли равон соати 01:30-и шаб ҳангоми гузаронидани чорабинии махсуси фаврӣ дар якҷоягӣ бо Гурӯҳи фаврии қӯшунҳои сарҳадӣ ва РКДАМ ҶТ дар вилояти Хатлон дар яке аз минтақаҳои дидбонгоҳи сарҳадии зертобеи Отряди сарҳадии «Ҳамадонӣ»-и сарҳади Тоҷикистону Афғонистон байни гурӯҳи мусаллаҳи қочоқчиёни номаълуми афғон, ки иборат аз 6-7 нафар буданд, дар вақти убури ғайриқонунии хати сарҳад задухӯрди шадиди мусаллаҳона ба вуқӯъ омад. Қочоқчиёни афғон ба муқовимати қатъӣ ва чусту чолоконаи сарҳадбонони тоҷик тоб оварда натавониста, аз тариқи қамишзор ба самти Афғонистон баргаштанд.
Ҳангоми азназаргузаронии ҷои ҳодиса зиёда аз 55 кг маводи мухаддири навъи ҳашиш, 2 кг афюн ва зиёда аз 1 кг героин дарёфт ва мусодира шуд.
Оид ба ин ҳодиса аз тарафи мақомоти дахлдори КДАМ ҶТ тафтиш идома дорад.
Дар ин бора Муҳаммад Улуғхоҷаев, сардори Маркази матбуоти Сарраёсати қӯшунҳои сарҳадии КДАМ ҶТ хабар дод.