Бори вазнини мураббигӣ

Душанбе, 28.03.2016 (АМИТ «Ховар»).- Мубин Эргашев, иҷрокунандаи вазифаи сармураббии дастаи мунтахаби Тоҷикистон баъди бохти дастаи мунтахаби кишварамон аз Австралия бо натиҷаи 7 бар 0 вазъи саломатиаш коҳиш ёфт ва ба Маркази миллии тандурустии шаҳри Душанбе интиқол дода шуд. Мутахассисони тиб ба мураббӣ дастур додаанд, ки аз футбол каме дур шуда, вазъи саломатии худро беҳтар гардонад. Аз ҳамин хотир дастаи мунтахаби кишварро дирӯз мураббии даста Роман Пилипчук ба тамрин ҳидоят кард.
Дар ҳайати дастаи мунтахаби кишвар дар бозӣ бо тими мунтахаби Қирғизистон тағйирот ворид шудааст. Дарвозабонҳо Алишер Додов аз Регар ТадАЗ, Абдулазиз Маҳкамов аз Олой-и Қирғизистон, муҳофизатгар Ҳасан Рустамов аз Хуҷанд, нимҳимоятгарон Фатҳулло Фатҳуллоев ва Парвиз Умарбоев аз Истиқлол , Амирбек Ҷӯрабоев аз Барқчӣ ва Аҳтам Ҳамроқулов аз Вахш ба даста баргардонида шуданд.
Дар навбати худ панҷ бозингар: дарвозабон Қурбоналӣ Бобоев, муҳофизатгарон Аҳтам Назаров (ҷароҳат), Далерҷон Тухтасунов (кортҳои зард), ниҳимоятгар Фирӯз Қараев ва ҳамлагар Давронҷон Тухтасунов дар бозӣ ширкат намекунанд.