Хуҷанд: Омодагӣ ба ҷашни Наврӯз

Хуҷанд, 07.03.2016 (АМИТ «Ховар»).- Раиси шаҳри Хуҷанд Раҷаббой Аҳмадзода бо муовинон ва роҳбарони муассисаҳои таълимӣ, идораҳои коммуналии ободонӣ, сабзазоркунӣ ва фаъолони шаҳр ҷаласаи корӣ доир намуд.
Дар ҷаласаи кор Раҷаббой Аҳмадзода аз масъулини шаҳрдорӣ доир ба омодагиҳои корхонаю ташкилот ва муассисаҳои маркази вилоят пурсиш ба амал оварда, бобати вусъати корҳои ободию сабзазоркунӣ дастуру супоришҳо дода, иброз дошт, ки бо тарҳу ороиши махсус хиёбону гулгашт ва кӯчаҳои шаҳрро бо гулу лолаҳои рангоранг оро дода, биноҳои ташкилоту муассисаҳои шаҳр рангубор карда шаванд.
Ҳамчунин тибқи супориши раиси шаҳри Хуҷанд насби шиору овезаҳо ва навиштаҷоти наврӯзӣ бояд то 15-уми март ба анҷом расида, дар рӯзҳои таҷлили Наврӯз шаҳр бояд комилан фазои идона ва симои наврӯзӣ дошта бошад.