Хуҷанд: Як миллион лолаи ҳолландӣ ба шукуфтан оғоз кард

Хуҷанд, 19.03.2016 (АМИТ «Ховар»). — Баробари оғози фасли баҳор шаҳри Хуҷанд қабои баҳорию наврӯзӣ ба бар кардааст. Ҳоло дар кӯчаю хиёбонҳо ва мавзеъҳои истироҳатии маркази вилояти Суғд беш аз 1 миллион гули лола дар марҳилаи шукуфтан аст.

Дар асоси дастуру ҳидоятҳои Асосгузори сулҳу Ваҳдати миллӣ,  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Хуҷанд барои таҷлили Наврӯзи хуҷастапай корҳои омодагӣ вусъат доранд. Тибқи иттилои  мутахассисон  дар давоми 15 рӯзи минбаъда кӯчаю хиёбонҳои шаҳри Хуҷандро лолаҳои рангоранги зебои навъи «ҳолландӣ» оро дода, тибқи нақшаи Мақомоти иҷрояи ҳокимияти шаҳри Хуҷанд боз ду миллион дона гулҳои ороишии навъи «Марҷонгул», 6 намуд гули навъи «Петуня», «Катарантус», «Вербена», «Галларгия», «Гамфренум», «Тагетис», «Газания», «Мехчагули хурд», «Гули тоҷ», «Цинерария» ва «Лакфеола» шинонда шудаанд.