Кӯлоб: Баргузории фестивали «Китоб ва мусиқӣ барои кӯдакону наврасони Тоҷикистон»

Душанбе, 15.03.2016 (АМИТ «Ховар»).- 13 феврали соли равон дар шаҳри Кӯлоби вилояти Хатлон бо мақсади тарғиб ва оммавигардонии хониш, ташаккули малакаи мутолиаи китоб, тарбия намудани ҳисси зебоипарастӣ дар замири наврасон, гиромидошти арзишҳои милливу умумибашарӣ ва мусоидат ба дарки неруи бузурги китобу мусиқӣ дар ҳаёти насли наврас даври навбатии Фестивали ҷумҳуриявии «Китоб ва мусиқӣ барои кӯдакону наврасони Тоҷикистон» баргузор шуд. Дар фестивал намоиши китобҳо, хулосаи библиографӣ, намоиши дастранҷи кӯдакону наврасон, мулоқот бо адибон ва композиторон доир гардида, озмунҳои гуногун, аз қабили «Синфи китобдӯст», «Навоҳои дилангези кӯдакона», «Ромишгарони наврас», «Хонандаи фаъол» баргузор гардиданд. Ба ғолибон ҷоизаҳои фестивал — «Барои қироати беҳтарин», «Барои беҳтарин намоиши китоб», «Барои беҳтарин оҳанг», «Барои тарғиби фаъолонаи Фестивал», «Ромишгари ҷавон» ва «Мутриби ҷавон» супорида шуданд.