Кумакҳои АНМН ба пиронсолон ва хонандагон

Душанбе, 28.03.2016. (АМИТ «Ховар»). -Чун анъана кумаки навбатии Агентии назорати маводи нашъаовари назди Президенти Ҷумҳурии Тоҷикистон ба хона-интернат барои маъюбон ва пиронсолони Батоши шаҳри Турсунзода ва Литсеи махсуси касбӣ-техникии шаҳри Душанбе расид.
Ин дафъа бошандагони хонаи пиронсолон соҳиби маҷмӯи мизу курсӣ гардиданд.
Маҷрӯҳон ва пирони барҷомонда, ки сарнавишт онҳоро ба ин бошишгоҳ овардааст, беш аз ҳар вақти дигар ба муҳаббату ғамхорӣ ва парасторӣ ниёз доранд.
Дар асоси дастури Президенти Ҷумҳурии Тоҷикистон «Дар бораи расонидани кумаки моддӣ ба маҷрӯҳон ва собиқадорони ҷанг ва меҳнат, хона-интернатҳо, хонаводаҳои эҳтиёҷманд» аз соли 2001 инҷониб агентӣ ба хона-интернат барои маъюбон ва пиронсолони Батоши шаҳри Турсунзода ба маблағи бештар аз 100 ҳазор сомонӣ ёрии моддӣ расонидааст.
Инчунин аз тарафи кормандони агентӣ ба Литсеи махсуси касбӣ-техникии пойтахт, ки дар он ҷо наврасони душвортарбия таҳсил менамоянд, кумаки хайриявӣ дар намуди маводи озуқаворӣ- орд, равған, биринҷ ва шакар расонида шуд.