«Лафзи ширин» бознашр гардид

«Забон омили асосии рушду камоли миллат аст»
Эмомалӣ Раҳмон, Пешвои миллат

Душанбе, 09.03.2016.(АМИТ «Ховар»).- Дар арафаи ҷашни ҷаҳонии Наврӯз китоби «Лафзи ширин» бознашр гардид. «Лафзи ширин» дастури таълимӣ барои кормандони муассисаҳои томактабӣ, марказҳои рушди кӯдакон ва волидайн буда, бо забони тоҷикӣ бознашр шуд. Муаллифони «Лафзи ширин» Маҳмадулло Лутфуллоев, академик, доктори илмҳои педагогӣ ва Лутфия Иматова, сармутахассиси Вазорати маориф ва илм, доктори илмҳои педагогӣ  мебошанд.
Дар саҳифаи аввали дастури таълимӣ расми Нишон ва Парчами давлатии Ҷумҳурии Тоҷикистон ва расми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон инчунин матни Суруди миллии Ҷумҳурии Тоҷикистон ҷой дода шудааст.
Дастури таълимии «Лафзи ширин» аз бахшҳои «Тоҷикистонам модари ҷонам», «Хонаи ободи мо», «Одобнома», «Ҳаёти гирду атрофро меомӯзем», «Боғча ҷои хуш аст», «Олами ҳайвонот ва наботот», «Тирамоҳи заррин», «Хуш омадӣ зимистон», «Баҳори хуррам омад», «Офтобаки тобистон», «Ман ба мактаб меравам», «Эҷодиёти даҳонии халқ», «Чистонҳо», «Чистонбозиҳои равону беохир», «»Тезгӯякҳо» ва ғайра иборат мебошад.
Инчунин «Лафзи ширин»-ро расмҳои гуногун, ки барои инкишофи нутқи кӯдакон нақши муҳим мебозанд, оро медиҳанд.
Дастури таълимии «Лафзи ширин» бо дастгирии мудири ширкати «Рухом» Муфарраҳ Муҳаббатов бознашр гардидааст.