Мулоқоти ректори ДМТ бо хатмкунандагони муассисаҳои таълимии Хуҷанд

Душанбе, 30.03.2016. (АМИТ «Ховар»). Дар Маркази фарҳанги шаҳри Хуҷанд мулоқоти ректори Донишгоҳи миллии Тоҷикистон академик Имомзода Муҳаммадюсуф Сайдалӣ бо хатмкунандагони муассисаҳои таълимии шаҳр баргузор гардид.
Муҳаммадюсуф Имомзода зимни суханронӣ аз иқдоми созандаи Асосгузори сулҳу Ваҳдати миллӣ, Пешвои миллат, Президенти кишвар муҳтарам Эмомалӣ Раҳмон ёдовар шуда, перомуни фаъолияти бонуфузтарин мактаби олии кишвар- Донишгоҳи миллии Тоҷикистон маълумоти муфассал дод. Донишгоҳ дорои 18 факултет, 114 кафедра, институти илмию тадқиқотӣ, литсейи равияи табиию риёзӣ, китобхонаи илмӣ ва электронӣ, 112 озмоишгоҳи илмию тадқиқотӣ, 52 синфхонаи компютерӣ, 39 ҳуҷраи лингафонӣ, 10 маркази хизматрасонии таълимӣ, 3 пойгоҳи таҷрибавӣ, осоишгоҳ, бунгоҳи тиббӣ ва майдончаҳои варзишӣ мебошад.
Хатмкунандагон ба ректори донишгоҳ саволҳои хешро перомуни вазъи таҳсил дар гурӯҳҳои шартномавӣ, ҳолати хобгоҳҳо, муайян намудани холи гузариш, таҳсил бо забони русӣ ва робитаҳои байналмилалии донишгоҳ ироа намуда, посухҳои муфассал гирифтанд.