Навгониҳо аз ФФТ

Душанбе, 5.03.2016 (АМИТ «Ховар»).-Кумитаи иҷроияи ФФТ бо баргузор кардани ҷаласаи навбатии худ як қатор масоилро мавриди баррасӣ  қарор дод. Пеш аз ҳама ҷаласа ба хулоса омад, ки қарори пешинаи худро нисбат ба иштироки ҳатмии бозингари ҷавони то 19 сола дар ҳайати дастаҳои Лигаи олиро аз байн бардорад. Ба ҳамин минвол акнун мураббиён имкон доранд аз рӯи хости худ дар ҳайат беҳтаринҳоро ба бозӣ гузоранд.

Бо қарори ин ҷаласа Чемпионати 25-уми мамлакат рӯзи 8-апрел бо ширкати 11 даста шурӯъ хоҳад шуд. Қуракашии ҷадвали мусобиқот ба рӯзи 10 март вогузор гардид.

Дар масъалаи макони баргузории мусобиқа барои Ҷоми олии Тоҷикистон ҳамагӣ ба хулоса омаданд, ки он дар майдони бетараф гузаронида шавад. Соли ҷорӣ чемпиони Тоҷикистон “Истиқлол” ва барандаи медалҳои нуқра “Хуҷанд” рӯзи 3 апрел дар варзишгоҳи Металлурги шаҳри Турсунзода дар ҳафтумин бозӣ барои Суперҷом бо ҳам вориди майдон мешаванд.

Ёвари сармураббии дастаи мунтахаби мамлакат Роман Пилипчук бо ҳидояти Кумитаи иҷроия ба вазифаи сармурабии тими мунтахаби Тоҷикистон(U-19), ки соли гузашта бо роҳбарии Салоҳиддин Ғафурров ба бозиҳои ниҳоии Ҷоми Осиё роҳхат гирифта буд, интихоб гардид.

Дар ҷаласа ин чунин дигар масъалаҳои рӯзмарра ҳаллу фасл гардиданд.