Наврӯзи донишҷӯён дар Қурғонтеппа
Қурғонтеппа, 25.03.2016. (АМИТ «Ховар).- Дар Донишгоҳи давлатии Қурғонтеппа ба номи Носири Хусрав ҷашни Наврӯз бо шукӯҳ ва шаҳомати хосса таҷлил гардид. Ҳамаи факултаҳои донишгоҳ ба ин ҷашн омодагии хуб гирифта буданд. Дар ҷамъомади тантанавӣ ба як гурӯҳ омӯзгорон ва донишҷӯён ифтихорнома ва мукофотҳои хотиравии донишгоҳ ва кумитаи иттифоқи касабаи донишгоҳ тақдим гардиданд. Аз ҷумла, 3 омӯзгори донишгоҳ барои ҳимояи бомуваффақияти рисолаҳои номзадӣ бо ифтихорнома ва мукофотҳои хотиравии кумитаи муттаҳидаи иттифоқи касабаи донишгоҳ сарфароз шуданд. Ба 7 донишҷӯ ва роҳбарони илмии онҳо мукофотҳои хотиравии донишгоҳ тақдим гардиданд.
Ғолибони хони наврӯзӣ бо диплом ва мукофотҳои хотиравии Кумитаи иттифоқи касабаи донишгоҳ сарфароз шуданд. Дастаи ҳаваскорони донишгоҳ бо ҳунари хуби худ ҷашнро зеботар намуд.