Оғози соли 2016: Мусовиҳои пайдарпаи “Истиқлол” ва “Хуҷанд”

Душанбе, 5.03.2016 (АМИТ «Ховар»).-Дар бозии чоруми худ “Истиқлол” ва “Хуҷанд” дар ду моҳи аввали соли равон ба тавофуқи мусовӣ мерасанд. Агар дар бозиҳои дӯстонаи байни ин дастаҳо  се маротиба натиҷаи 1 бар 1, 2 бар 2, ва 0 бар 0 ба даст омада бошад, пас дирӯз дар майдони марказии пойтахт дар доираи бозиҳои даври дуввуми Ҷоми ФФТ боз натиҷаи мусовии 2 бар 2 ба қайд гирифта шуд.

“Истиқлол” тавасутии зарбаи ҷаримавӣ дар иҷрои Манучеҳр Ҷалилов ҳисобро боз кард. Фарҳод Тоҳиров дар нимаи дуввум ҳисобро мусовӣ карда Дилшод Бозоров хуҷандиҳоро ба сафи пеш баровард. Ба истиқлолиҳо муяссар гардид, ки хати дифоъи “Хуҷанд”-ро ба хато кардан маҷбур намоянд. Дар натиҷа зарбаи Фатҳулло Фатҳуллоевро Далер Тӯхтасунов нодуруст баргардонд ва тӯб вориди дарвоза шуд.

Дар бозии дигари гурӯҳи “А” “Саройкамар” ва “Помир” низ ба натиҷаи сулҳомези 1 бар 1 расиданд. “Хуҷанд” ва “Истиқлол” дар гурӯҳ бо 4 имтиёзӣ пешсафанд.