Пентагон: ИМА имконияти истеҳсоли яроқи кимиёвии террористони ДИ-ро заиф карданд

Душанбе, 11.03.2016. (АМИТ «Ховар»). — Зарбаҳои ҳавоии ИМА имконияти истеҳсоли яроқи кимиёвии гурӯҳи террористии ба ном «Давлати исломӣ»-ро заиф карданд. Дар ин бора рӯзи панҷшанбе сухангӯи Пентагон Питер Кук хабар дод.
«Мо итминон дорем ба мо муяссар гардидааст, ки ба имконияти истеҳсоли яроқи кимиёвии онҳо хисорот расонем. Мо аз он чӣ ки ба даст овардем, қаноатмандем», — гуфт ӯ.
Чанде пеш шабакаи телевизионии CNN гузориш дод, ки неруҳои ҳавоии ИМА дар Ироқ ба истеҳкоми ДИ зарба заданд. П. Кук тасдиқ кард, ки амалиёт аз рӯи маълумоти яке аз роҳбарони ДИ, ки чанде пеш аз ҷониби дастаи таъйиноти махсуси ИМА дастгир гардида буд, гузаронида шуд.
«Мо тахмин дорем, ки маълумоти ба дастовардаи мо имкон медиҳад амалиёти иловагӣ гузаронем… Мо ҳоло барои баррасӣ ҳадафҳои дигар низ дорем», — иттилоъ дод намояндаи Пентагон. Ӯ дар бораи дар куҷо ва кай дастгир гардидани он ҷангӣ тафсилоти бештаре нагуфт.