Ҳаким Фузайлов — сармураббии нави дастаи мунтахаби Тоҷикистон

Душанбе, 29.04.2016 /АМИТ «Ховар»/. Ҳаким Фузайлов,  бозингари шӯҳратёри дастаи «Помир»-и Душанбе, муовини роҳбари техникии Федератсияи футболи Тоҷикистон ба вазифаи сармураббии дастаи мунтахаби Тоҷикистон таъйин гардид.
Ба зиммаи ин мураббии 51-сола вазифаи ба бозиҳои ниҳоии Ҷоми Осиё, ки соли 2019 дар Амороти Мутаҳидаи Араб мегузаранд, роҳхат гирифтани дастаи мунтахаби кишвар вогузор шуд.
Ҳаким Фузайлов ба ҳайси сармураббӣ рӯзи 2 июн дастаи мунтахаби Тоҷикистонро дар бозӣ бо дастаи мунтахаби Бангладеш дар Варзишгоҳи марказии шаҳри Душанбе ба майдон мебарорад. Бозии ҷавобии ин дастаҳо  7 июн дар Бангладеш дар назар дошта шудааст.
Муаррифии Ҳаким Фузайлов расман рӯзи 3 май дар конфронси матбуотие дар ФФТ сурат мегирад. Ӯ ба саволҳои хабарнигорон ҷавоб мегӯяд.
Ҳаким Қаюмович Фузайлов 12 августа соли 1964 таваллуд шудааст. Ҳамчун бозингар қадами нахустини худро ба футболи касбӣ дар дастаи «Пахтакор»-и Қурғонтеппа гузоштааст. Аз соли 1986 то соли 1991 дар ҳайати дастаи «Помир»-и Душанбе бозӣ карда, баъдан соли 1992 ба дастаи «Локомотив»-и Маскав гузаштааст. Дар ҳайати ин даста ӯ соли 1994 сазовори медалҳои биринҷии Чемпионати Русия гардидааст. Соли 1995 даъвати дастаи «Арсенал»-и Туларо пазируфта, дувуним сол дар лигаи дуввуми Русия ба ҳайси капитан ҳунарнамоӣ кардааст. Баъди анҷоми мавсими соли 1997 ба даъвати дастаҳои «Металлург»-и Красноярск, «Дӯстлик»-и Узбекистон ва клубе аз дивизиони дуввуми Франсия нигоҳ накарда, Ҳаким Фузайлов майдони футболро тарк кард.
Ба ҳайси мураббӣ Ҳаким Фузайлов клуби узбекистонии «Бухоро»-ро  соли 1990  ва баъдан «Динамо»-и Самарқандро машқ додааст. Соли  2003 сармураббии дастаи «Андиҷон» ва баъди як сол мураббии «Титан»-и Русия шудааст. Аз соли  2005 дастаи «Локомотив»-и Калугаро машқ додааст.
Солҳои  2005-2010 дар вазифаи мураббии интихобгар дар дастаи «Локомотив»-и Маскав фаъолият кардааст. Аз соли 2011 — муовини директори клуби Ростов буд.
Моҳи январи соли 2012 Фузайлов ба вазифаи  ноиби президенти клуби «Локомотив»-и Тошканд  дар самти интихоби бозингарон вазифадор шуда, баъдан сармураббии ин даста таъйин гардид.
Баъди аз дастаи «Локомотив» рафтан Фузайлов дар вазифаи мураббии интихобгари клуби «Терек»-и Грозний кор кардааст. Аз моҳи январ то ҳоло дар вазифаи муовини роҳбари техникии Федератсияи футболи Тоҷикистон кор мекард.