«Беҳтарин оилаи китобхон» ва «Китобхони беҳтарин» — ҳамоиш дар Қурғонтеппа

Душанбе, 28.04.2016./АМИТ«Ховар»/. Китобхонаи оммавии вилояти Хатлон ба номи Шамсиддин Шоҳин  бахшида ба 25-солагии Истиқлолияти давлатии Ҷумҳурии Тоҷикистон ва 5-солагии Қонуни Ҷумҳурии Тоҷикистон  «Дар бораи масъулияти падару модар дар тарбияи фарзанд»  аз  1 май  то 31 августи соли равон  дар шаҳри Қурғонтеппа ҳамоиши «Беҳтарин оилаи китобхон» ва «Китобхони беҳтарин» -ро дар мавзӯи «Нон ғизои ҷон бошад, китоб ғизои рӯҳ аст»  мегузаронад. Мақсади асосии баргузор намудани ҳамоиш талқини аҳолӣ, бахусус ҷавонону наврасон ба мутолиаи китоб  ва арҷгузорӣ ба он аст.
Дар ин бора аз Раёсати фарҳанги вилояти Хатлон хабар дода, дар тақвияти он зикр карданд, ки ҳамоиши мазкур  4 сентябри соли равон  дар Рӯзи китоб ҷамъбаст гардида, беҳтарин китобхонҳо бо туҳфаҳои хотиравӣ сарфароз мегарданд.