Машваратҳои сиёсии Тоҷикистон ва Кувайт

Душанбе, 06.04.2016 /АМИТ «Ховар»/. 5 апрели соли 2016 дар шаҳри Душанбе нахустин машваратҳои сиёсӣ байни вазоратҳои корҳои хориҷии Ҷумҳурии Тоҷикистон ва Давлати Кувайт баргузор шуданд. Дар ин машваратҳо ҳайати Тоҷикистонро муовини якуми вазири корҳои хориҷӣ Низомиддин Зоҳидӣ ва ҳайати Кувайтро Муовини вазири корҳои хориҷии ин кишвар Алӣ Сулаймон Ас-Саид роҳбарӣ намуданд.
Зимни машваратҳо, ки дар фазои дӯстона ва ҳамдигарфаҳмӣ сурат гирифтанд, ҷонибҳо масъалаҳои тақвияти минбаъдаи робитаҳои сиёсӣ, тавсеаи ҳамкориҳо дар арсаҳои тиҷоратию иқтисодӣ, сармоягузорӣ, фарҳангӣ, сайёҳӣ ва гуманитарӣ, таҳкими пояҳои шартномавию ҳуқуқии муносибатҳои дуҷониба ва ҳамкориҳо дар ҳошияи созмонҳои байналмилалӣ ва минтақавиро баррасӣ карданд.
Нақшаи иқдомҳои муштарак ҷиҳати пешбурди ҳамкориҳои мутақобилан судманд дар арсаҳои мазкур, баргузории музокиротҳо дар сутӯҳи олию баланд ва ҷалби сармоягузориҳои Кувайт дар татбиқи тарҳҳои иқтисодӣ, иҷтимоӣ ва зерсохтории Тоҷикистон мувофиқа шуд.
Ҳамчунин, роҷеъ ба масъалаҳои мубрами минтақавӣ ва абзорҳои тақвияти ҳамкориҳои ду кишвар дар самти мубориза алайҳи терроризми байналмилалӣ, ифротгароӣ, қочоқи маводи мухаддир ва ҷиноятҳои муташаккилона табодули назар карда шуд.