Роғун: омодагиҳо барои таъмини иштироки фаъолонаи раъйдиҳандагон

Роғун, 14.04.2016 /АМИТ «Ховар»/. Дирӯз дар толори шуъбаи фарҳанги шаҳри Роғун бо мақсади дар сатҳи баланд доир намудани раъйпурсии умумихалқӣ оид ба ворид намудани тағйиру иловаҳо ба Конститутсияи (Сарқонуни) Ҷумҳурии Тоҷикистон мулоқоти масъулини Комиссияи ҳавзавии раъйпурсии № 6- и шаҳри Роғун ва гурӯҳи кории мақомоти иҷроияи ҳокимияти давлатӣ бо собиқадорону кормандони ташкилоту муассисаҳои таълимӣ ва ҷавонон доир гардид.
Дар он раиси Комиссияи ҳавзавии раъйпурсӣ Ҷурахон Мусоев ва муовини раиси шаҳр оид ба муҳтавои ворид намудани тағйиру иловаҳо ба Конститутсияи (Сарқонуни) Ҷумҳурии Тоҷикистон таъкид карданд, ки дар сатҳи баланд гузаронидани раъйпурсӣ аз иштироки фаъолонаи раъйдиҳандагон ва ҷавононе, ки бори аввал дар райъпурсии умумихалқӣ иштирок мекунанд, вобастагӣ дорад.
Ҳамчунин гуфта шуд, ки дар 3 ҷамоати шаҳраку деҳот 21 участкаи раъйпурсӣ таъсис дода шуда, то имрӯз 21 ҳазору 60 нафар раъйдиҳанда муайян гардидааст, ки барои иштироки фаъолонаи онҳо дар ин маъракаи сиёсӣ аз ҷониби масъулин шароити хуб фароҳам оварда шудааст.
Мувофиқи нақшаи тақвимии Комиссияи ҳавзавии раъйпурсии № 6 ва мақомоти иҷроияи ҳокимияти давлатии шаҳри Роғун барои зиёд гардидани дониши ҳуқуқии шаҳрвандон ва иштироки фаъолонаи онҳо дар раъйпурсӣ чунин вохӯрию корҳои фаҳмондадиҳӣ дар ҳудуди дигар ҷамоатҳои шаҳраку деҳот низ баргузор мегарданд.