Рўнамоии «Фидоиён» дар Гулдара
Гулистон, 13.04.2016. /АМИТ “Ховар”/. «Фидоиён» -таҳти ин унвон дар муассисаи таълимии №4-и деҳаи Гулдараи шаҳраки Адрасмон чорабинии фарҳангӣ бахшида ба китобу китобдорӣ доир гардид. Иштирокдорони чорабинӣ адибону олимон ва рӯзноманигорони соҳили “Баҳри тоҷик” , омӯзгорону толибилмони мактабҳои мазкур дар васфи китоб ва илму дониш баромадҳои ҷолиб намуда, баён доштанд, ки китоб дар ҳар давру замон махзани илму дониш, сарчашмаи завқу хирад ва фурўғи субҳи доноӣ мебошад.
Тавре Рустами Одизода, сармуҳаррири рӯзномаи “Соҳил” ба АМИТ “Ховар” хабар дод, дар чорабинӣ рўнамоии китоби панҷуми соҳибқалами ҷавон, узви доираи маҳфили адабии «Илҳом»-и шаҳри Гулистон Муҳаммад Гулбой бо номи «Фидоиён» доир гардид.
Чорабинии мазкур бо ибтикори доираи адабии «Илҳом» ва созмони ибтидоии шаҳрии Иттифоқи журналистони Тоҷикистон барпо гардид.