Се холи аввалини гулдухтарони тоҷик

Душанбе, 28.04.2016 /АМИТ «Ховар»/. Дар доираи мусобиқаи минтақавии Чемпионати Осиё байни духтарони то 14-солаи минтақаи Осиёи Ҷанубӣ ва Марказӣ, ки дар мамлакат идома дорад, дар даври дуввум  дастаи мунтахаби Тоҷикистон тими Бутанро бо ҳисоби 4:1 мағлуб кард.
Ду голи тими  мунтахаби Тоҷикистонро капитани даста Нилуфар Абдулҳаева ба ҳадаф расонд. Гулшан Сафарова ва Матлубаи Даминзода бо як голӣ дар ин ғалаба саҳм гузоштанд.
Дар бозии дигари гурӯҳи “А” дастаи мунтахаби Эрон бар дастаи Қирғизистон бо ҳисоби 2:0 пирӯз шуд.
Ҳамин тавр, баъди ду даври мусобиқа дар гурӯҳи «А» тими мунтахаби Эрон бо 6 имтиёз пешсаф буда, дастаҳои Тоҷикистону Бутан сеимтиёзӣ доранд. Дастаи мунтахаби Қирғизистон то ҳол ягон хол ба даст наовардааст.
Дар даври дувум дар гурӯҳи “В”тими мунтахаби Ҳиндустон дастаи Непалро бо ҳисоби калони  9:0 шикаст дод. Дар ин гурӯҳ  Бангладеш ва Ҳиндустон сеимтиёзӣ гирифтаанд.