Абдуллоҳ Абдуллоҳ: «Тоҷикистон дар тамоми арсаҳо дар паҳлуи Афғонистон буда, ба ҳайси як ҳамсояи нек он чиро ки дар тавонаш буд, дар ҳимоят аз Афғонистон дареғ надоштааст»

Душанбе, 13.05.2016 /АМИТ «Ховар»/. «Ҷумҳурии Тоҷикистон дар тайи ин солҳо дар тамоми арсаҳо дар паҳлуи Афғонистон буда, бидуни ягон чашмдошти сиёсӣ ба ҳайси як ҳамсояи нек он чиро, ки дар тавонашон буд, дар ҳимоят аз Афғонистон дареғ надоштааст». Ин матлабро Раиси иҷроияи Ҳукумати Ваҳдати миллии Афғонистон Абдуллоҳ Абдуллоҳ шоми дирӯз баъд аз мулоқот бо Пешвои миллат Эмомалӣ Раҳмон дар назди хабарнигорони воситаҳои ахбори оммаи дохил ва хориҷи кишвар таъкид намуд.
Абдуллоҳ Абдуллоҳ ба Президенти Ҷумҳурии Тоҷикистон муҳтарам Эмомалӣ Раҳмон барои таваҷҷуҳ ва талоше, ки барои амалӣ гаштани Лоиҳаи минтақавии интиқоли неруи барқи CASA-1000 доштанд, сипосу миннатдорӣ баён намуда, изҳори боварӣ кард, ки қадами аввалине, ки дар ин росто гузошта хоҳад шуд, густурдатар бошад.
«Дар ҷараёни сафар бо муҳтарам Эмомалӣ Раҳмон дар масоили ҳамкории мутақобила, минтақавӣ, ҳамкорӣ дар сатҳи ҷаҳонӣ ва байналмилалӣ, инчунин дар тамоми арсаҳои равобити дуҷониба суҳбат намудем»,-гуфт ӯ.
«Чанд рӯз пеш Раисҷумҳури Ҷумҳурии Исломии Афғонистон Муҳаммад Ашраф Ғанӣ ва ман чанд моҳе қабл ба кишвари Тоҷикистон сафари расмӣ доштем. Дар тамоми мулоқот нияти ду тараф ба хотири густариши ҳамкорӣ дар тамоми арсаҳо возеҳ ва рӯшан буда, қадамҳои амалӣ дар ин росто бардошта шуданд. Заминаҳо ва созишномаҳо дар тамоми бахшҳои ҳамкорӣ вуҷуд доранд, ки имрӯз ҳам дар ҷараёни суҳбат онҳо баррасӣ гардиданд. Умедворам, ки дар муддати кутоҳ он мувофиқатномаҳое, ки сурат гирифта буданд, аз ҷумла дар бахшҳои тиҷоратӣ, иқтисодӣ ҳамкории техникӣ амалӣ хоҳанд шуд»,-иброз дошт Абдуллоҳ Абдуллоҳ.
Раиси иҷроияи Ҳукумати Ваҳдати миллии Афғонистон иброз намуд, ки зимни суҳбат бо Президенти кишвар масъалаи марбут ба амният ва суботи минтақаро низ баррасӣ намуданд .