Афғонистон: дар натиҷаи обхезӣ 24 нафар қурбон шуданд

Душанбе, 19.05.2016. /АМИТ «Ховар»/. Дар манотиқи дурдасти музофоти Сарипули Афғонистон бар асари обхезие, ки дар натиҷаи боришоти пай дар пай сар зад, на кам аз 24 нафар қурбон шуданд. Дар ин бора агентии «Синхуа» бо такя ба гуфтаи волии ин музофот иттилоъ дод.
«Дар натиҷаи офати табиие, ки дар минтақаи Куҳистонат рух дод, дар маҷмӯъ 10 нафар осеб дида, 40 каси дигар бедарак гаштанд. Обхезӣ якчанд деҳаро фаро гирифта, беш аз 200 хонаро дар ин минтақа хароб кард», — гуфт волии музофот Зоҳир Ваҳдат.
Бино ба гуфтаи ӯ, обхезӣ ҳамчунин садҳо боғ ва ҳазорҳо гектар заминро шустааст. Теъдоди қурбониён ва осебдидагон метавонад афзояд.