Дар Хуҷанд 14 нафар собиқадорони ҶДҶ қадрдонӣ гардиданд

Душанбе, 06.05.2016./АМИТ«Ховар»/. Дар мақомоти иҷроияи ҳокимияти давлатии шаҳри Хуҷанд бахшида ба 71- солагии Рӯзи Ғалаба дар Ҷанги дуюми ҷаҳонӣ ҷамъомад баргузор гардид. Дар ҷамъомад Бозоралӣ Одиназода, муовини вазири маориф ва илми Ҷумҳурии Тоҷикистон иштирокдорони ҷангро аз номи Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон табрик намуда, ба 5 нафари онҳо: Мамадхон Эшонов, Ашӯр Комилов, Аҳрулло Саидов, Маликаброр Шарипов ва Сотим Мирзоалиев кумакҳои яквақтаи пулии Сарвари давлатро супорид. Дар Хуҷанд ҳоло 14 нафар собиқадорони ҶДҶ зиндагӣ менамоянд.
Бозоралӣ Одиназода бо намояндагони шаҳри Хуҷанд барои расонидани кумак ба дигар собиқадорони ҷанг, ки дар вохӯрии мазкур иштирок карда натавонистанд, ба аёдати онҳо ба манзили истиқоматиашон рафтанд.
Дар ин бора аз Маркази матбуоти мақомоти иҷроияи ҳокимияти давлатии шаҳри Хуҷанд иттилоъ доданд, ки ба ҳар як иштирокдори ҷанг дар баробари туҳфаи пулии Сарвари давлат 1000 сомонӣ аз мақомоти иҷроияи ҳокимияти давлатии вилояти Суғд ва 500 сомонӣ аз мақомоти иҷроияи ҳокимияти шаҳри Хуҷанд кумакпулии яквақта ва маводи ғизоӣ тақдим гардид.