«Рӯзноманигор бояд такя ба ҳақиқату воқеият кунад»-бардошт аз конфронси ҷумҳуриявӣ

Душанбе, 03.05.2016. /АМИТ «Ховар»/. «Масъалаи тарбия ва бозомӯзии мутахассисони соҳаи воситаҳои ахбори омма яке аз масъалаҳои муҳим мебошад, зеро он ҳамеша ба мутахассисони касбӣ ниёз дорад. Дарвоқеъ дар тарбия ва бозомӯзии рӯзноманигорон на танҳо донишгоҳҳои вобаста ба соҳаи журналистика, балки худи расонаҳои хабарӣ низ бояд саҳм гузоранд. Рӯзноманигорон бояд малакаи касбиашонро доимо такмил диҳанд»,-гуфт раиси Иттифоқи журналистони Тоҷикистон, директори Академияи ВАО Зинатулло Исмоилзода зимни конфронс бахшида ба Рӯзи озодии матбуот, ки имрӯз дар Душанбе таҳти унвони «Озодии баён: мушкилот ва дурнамо» доир гардид. Мақсад аз конфронс таҳлили дастовард, мушкилот ва пешомадҳои ВАО дар Тоҷикистон дар як соли охир ва таҳияи тавcияҳо барои рушди озодии матбуот дар кишвар мебошад.
«Сол ба сол вазъи озодӣ дар кишвар тадриҷан роиҷ мегардад. Озодии баён дар муҳити Тоҷикистон ҷанбаи ҳуқуқӣ пайдо кардааст ва дар Конститутсияи ҶТ дар моддаи 30 кафолат ба озодии баён ба ҳукми қонун даромадааст. Дар Тоҷикистон арзи ҳастӣ кардани навъҳои гуногуни матбуот худ нишонаи мавҷудияти озодии баён аст, зеро ин гуногунрангии нашрияҳо имкон медиҳад, ки ақидаҳои гуногун интишор гарданд. Паҳлуи дигари озодии баёнро низ мо набояд аз мадди назар дур кунем, ки он дар заминаи қонун амал кардан, фарҳанги миллиро тарғибу ташвиқ намудан ва ҳувияти миллиро пеш бурдан аст. Рӯзноманигор бояд такя ба ҳақиқату воқеият кунад. Барои ифшо кардани камбудӣ касе моро гунаҳкор намекунад, аммо ҳар амал дар чаҳорчӯбаи қонун ва этикаи рӯзноманигорӣ бояд сурат гирад»,- изҳори андеша кард профессор М.Муродӣ.
Иштирокдорони конфронс инчунин масъалаҳои дастрасӣ ба ахбор, камбудии журналистони ҳирфавӣ дар шароити афзоиши хатарҳои амниятӣ, тағйирёбии шакл ва пешниҳоди матлаб дар ВАО, мушкилоти асосии расонаҳои минтақавии Тоҷикистонро таҳлил ва баррасӣ намуданд.