Таҷлили Рӯзи Ғалаба ва супоридани туҳфаҳои Пешвои миллат ба иштирокдорони ҶДҶ дар Ваҳдат

Ваҳдат,10.05.2016 /АМИТ «Ховар»/. Бахшида ба таҷлили Рӯзи Ғалаба дар Ҷанги дуюми ҷаҳон дар шаҳри Ваҳдат маросими гузоштани гулчамбар дар назди муҷассамаи Модар, ба хотири шаҳидони роҳи Ватан ва барномаи идона баргузор шуд. Дар ҷашнвора шаҳрвандон аз тамоми қишрҳои ҷомеа, хурду калон, пиру ҷавон, иштирокдорони ҷанги Афғонистон, собиқадорони меҳнат ва варзишгарон иштирок намуданд. Дар боғи фарҳангии шаҳр бо иштироки ҳунармандони ҷавон консерти идона ва сайри оммавӣ ташкил карда шуд.
Ихтиёриёни филиали Иттифоқи ҷавонони Тоҷикистон дар шаҳри Ваҳдат ин фурсати идонаро аз даст надода, миёни насли ҷавон мусобиқаи шашкабозӣ таҳти унвони Ҷавонон- пайрави Пешвои миллат гузарониданд. Ҳамчунин дар арафаи ин ҷашни хотирмон намояндаи Ҳукумати Ҷумҳурии Тоҷикистон Ҷонибек Холиқназар ва муовини раиси шаҳр Фарзона Хочазода ба аёдати 12 нафар иштирокдори ҶДҶ рафта, туҳфаҳои пулии Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро супориданд.