Вохӯрии дӯстонаи «Истиқлол» бо «Сомон» бахшида ба рӯзи ҷавонон
![](https://khovar.tj/wp-content/uploads/2016/05/somon_istiklol.jpg)
Душанбе, 25.05.2016 /АМИТ «Ховар»/.Дар доираи баргузории ҷашнҳо бахшида ба рӯзи ҷавонони кишвар клуби футболи «Истиқлол», чемпиони чоркаратаи Тоҷикистон барои доир кардани вохӯрии санҷишӣ бо дастаи Лигаи дуввуми минтақаи Хатлон- «Сомон»-и ноҳияи Данғара ба ин ноҳия омад. Шодии мухлисони футболро ҳадду канор набуд, зеро ҳайати асосии дастаи «Истиқлол», ки аксарашонро бозингарони тими миллии кишвар ташкил медоданд, якҷоя бо легионерҳо ба бозӣ ҳозир шуданд. Ҳунарнамоии дастаҳо хеле ҷолибу шавқовар гузашт ва «чемпионҳо» бо ҳисоби 3:2 ғалаба карданд.
Шериддин Бобоев аз дастаи «Истиқлол» муаллифи ду гол шуд. Як голи меҳмононро Самандар Шарифов, бозингари «Сомон» ғофилан ба дарвозаи дастааш зад. Аз дастаи «Сомон» голҳоро Шараф Саидов ва Хуршед Халилов (аз ҷаримаи 11-метра) ба дарвозаи истиқлолиҳо заданд.