Кўдакону наврасон ба истироҳат ва солимгардонӣ фаро гирифта мешаванд

Душанбе, 07.06.2016 /АМИТ «Ховар»/.  Дар вилояти Хатлон тобистони соли равон дар 6 истироҳатгоҳи беруназшаҳрӣ, 1550 лагери наздимактабӣ ва таълимӣ-фароғатӣ, 351 меҳнатӣ-истироҳатӣ ва 264 истироҳатгоҳи варзишӣ-беҳдоштӣ шумораи 182 196 нафар кўдакону наврасон ба истироҳату солимгардонӣ фаро гирифта мешаванд.
Тибқи нақша соли равон аксарияти кўдакону наврасони вилоят дар истироҳатгоҳҳои беруназшаҳрии «Шифобахш»-и ноҳияи Вахш, «Шарора»-и ноҳияи Муъминобод, «Чайка» ва «Обшорон»-и ноҳияи Варзоб,  «Қаратоғ»-и ноҳияи Шаҳринав, «Чангоб»-и шаҳри Ҳисор ва «20 — солагии истиқлолият»-и вилояти Суғд ба истироҳату солимгардонӣ фаро гирифта мешаванд. Пешниҳоди Шўрои иттифоқҳои касабаи вилоят дар бораи бунёд намудани истироҳатгоҳи кўдакону наврасон дар ноҳияи Балҷувони вилояти Хатлон аз ҷониби Мақомоти иҷроияи ҳокимияти давлатии вилоят ҷонибдорӣ карда шуда, масъалаи  ҷудо кардани қитъаи замин барои ин мақсад дар арафаи анҷомёбӣ мебошад.
Дар Вилояти Мухтори Кўҳистони Бадахшон дар назди 79 таълимгоҳ барои 3100 нафар, 22 истироҳатгоҳи беруназшаҳрӣ барои 1927 нафар ва 5 лагери шабонарўзӣ аз ҳисоби хазинаи Оғохон барои 1500 нафар ва 1 лагери наздимактабӣ барои 320 нафар кўдакон дар 3-4 баст баҳри истироҳату солимгардонии хонандагон ташкил карда шудааст.