Назари хосса ба технологияи истеҳсоли маҳсулоти растанипарварӣ дар ДТТ

Душанбе, 8.06.2016 /АМИТ «Ховар»/. Дар ҳошияи татбиқи амалии яке аз ҳадафҳои стратегии ҳукумати кишвар- таъмини амнияти озуқаворӣ бо ибтикори Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд семинари илмӣ-амалии ҷумҳуриявӣ дар мавзӯи «Технологияи муосири истеҳсоли маҳсулоти растанипарварӣ» доир гардид. Дар кори семинар олимони соҳа, намояндагони ташкилотҳои байналхалқии марбут ба соҳаи кишоварзӣ, роҳбарони ҳоҷагиҳои деҳқонӣ, намояндагони раёсати кишоварзӣ, Ассотсиатсияи истифодабарандагони об ва беҳдошти замини вилояти Суғд ширкат варзиданд.
Дар семинар роҳҳо ва сарчашмаҳои афзун намудани истеҳсолот, ҷараёни ислоҳоти соҳаи  кишоварзӣ,  усулҳои парвариши муосири дарахтон аз тариқи  технологияи интенсивӣ,  усулҳои обёрии қатрагӣ,  роҳҳои бартараф намудани ҳашароти зараррасон,  вусъат бахшидани соҳаи тухмипарварӣ аз забони мутахассисон садо доданд.
Дар фарҷом аз ҷониби аҳли нишаст барои беҳбудии вазъ якчанд таклифҳо пешниҳод шуданд.  Аз ҷумла, зикр шуд, ки дар назди кафедраи агротехнологияи Донишкадаи политехникии шаҳри Хуҷанд  курси бозомӯзии мутахассисони соҳа ташкил карда шавад.
Ҳамчунин дар оянда кушодани ихтисоси гидромеханик  ба фоидаи кор аст.