Ҷоми чемпионҳои Осиё: Корея, Амороти Муттаҳидаи Араб ва Чин бо ду дастаӣ муборизаро барои Ҷом идома медиҳанд

Душанбе, 10.06.2016 /АМИТ «Ховар»/. Дар қуръакашие, ки дар бошгоҳи Конфедератсияи футболи Осиё-шаҳри Куала-Лумпури Малайзия  ба сомон расид, иштирокдорони марҳалаи ¼- ниҳоии Ҷоми чемпионҳои Осиё ҳарифони худро шинохтанд. «Шанхай Сипг»-и Чин бо «Чонбук Хундай моторс»-и Кореяи Ҷанубӣ, «Алайн»-и АМА бо «Локомотив»-и Узбекистон, «Сеул»-и Корея бо «Шандунг Линенг»-и Чин ва «Алҷайш»-и Қатар бо «Алнаср»-и АМА дар моҳи август ва сентябр бо ҳам қувва меозмоянд.
Дар бозиҳои ¼- ниҳоӣ аз Кореяи Ҷанубӣ, Амороти Мутаҳидаи Араб ва Чин ду дастаӣ муборизаро барои Ҷом идома медиҳанд. Вохӯриҳои нимниҳоӣ бо ширкати ғолибони ҷуфти аввал бо дуюм ва сеюм бо чорум гузаронида мешаванд .
Соҳиби  Ҷоми чемпионҳои Осиё дар ду бозӣ- рафту баргашт муайян карда мешавад.