Фаъолияти байналмилалии Пешвои миллат Эмомалӣ Раҳмон: бозгашти давлати миллии тоҷикон ба арсаи сиёсати ҷаҳонӣ

Душанбе, 01.07.2016. /АМИТ «Ховар»/. «Фаъолияти байналмилалии  Пешвои миллат Эмомалӣ Раҳмон: бозгашти  давлати миллии тоҷикон  ба арсаи сиёсати ҷаҳонӣ»- чунин ном дорад китоби нави мушовири калони  бахши Ёрдамчии Президенти  Ҷумҳурии Тоҷикистон оид ба масъалаҳои робитаҳои хориҷӣ Зафар Сайидзода, ки  дар нашриёти «Контраст»-и Душанбе ба забони тоҷикӣ аз чоп баромад.
Китоб ба ифтихори ҷашни барои мардуми тоҷик таърихӣ 25-солагии Истиқлолияти давлатии Ҷумҳурии Тоҷикистон мунташир гардидааст. Дар рисолаи илмӣ  аз пешрафтҳои беназири миллати тоҷик  дар даврони навин дар мисоли бахши   муҳимтарини ҳаёти сиёсии  Ватани азизамон- сиёсати хориҷӣ, ки  маҳз бо шарофати  фаъолияти назариявию  амалии Асосгузори сулҳу ваҳдати миллӣ- Пешвои миллат Президенти Ҷумҳурии Тоҷикистон муҳтарам Эмомалӣ Раҳмон  ташаккулу тавсеа ёфтааст, сухан меравад.
Китоб аз муқаддима ва бахшҳои «Тоҷикистон дар низоми  ҷаҳони кунунӣ», «Эмомалӣ Раҳмон — бунёдгузори сиёсати хориҷии Ҷумҳурии Тоҷикистон», «Усулҳои сиёсати хориҷии Ҷумҳурии Тоҷикистон», «Вазифаҳои сиёсати хориҷии Ҷумҳурии Тоҷикистон» ва «Тоҷикистон дар арсаҳои  ҳамкории байналмилалӣ» иборат  мебошад.