Мусобиқа барои дарёфти Ҷоми Истиқлолият оғоз гардид

Душанбе, 16.07.2016. /АМИТ «Ховар»/. Бо ибтикори ширкати «Фароз» Мусобиқаи ҷумҳуриявӣ оид ба футболи хурд бахшида ба 25-умин солгарди Истиқлолияти давлатии Ҷумҳурии Тоҷикистон оғоз гардид.
Мусобиқаи мазкур миёни дастаҳои футболи хурд, дар тамоми шаҳру ноҳияҳо ва маркази вилоятҳо баргузор мегардад. Ғолибони ин мусобиқа дар арафаи таҷлили Рӯзи Истиқлолияти давлатии Ҷумҳурии Тоҷикистон муайян гардида, бо туҳфаҳои арзанда қадрдонӣ мегарданд.
Даври аввали мусобиқа миёни дастаҳои вилояти Хатлон дар шаҳри  Қӯрғонтеппа баргузор мегардад. Туҳфаи асосии ин мусобиқа Ҷоми 25-солагии Истиқлолият номгузорӣ шудааст. Албатта, мақсад аз баргузории ин мусобиқа, оммавӣ гардонидани футбол ва тарғиби тарзи ҳаёти солим мебошад.
Бозӣ миёни дастаҳои Кӯлоб ва Қӯрғонтеппа, ки дар шаҳри  Қурғонтеппа баргузор шуд, бо ҳисоби 3:1 ба фоидаи дастаи мизбон ба анҷом расид. Бозии ҷавобӣ бошад, 17 июл дар шаҳри Кӯлоб баргузор мешавад.