Нокомӣ дар бозии аввали «Роҳи абрешим-Хуашан-2016»

Душанбе, 12.07.2016 /АМИТ «Ховар»/. Тими мунтахаби наврасони то 16-солаи Тоҷикистон дар вохӯрии аввали мусобиқаи байналмилалии «Роҳи абрешим-Хуашан-2016» дирӯз бо тими мунтахаби Кореяи Ҷанубӣ қувва озмуда, бо натиҷаи 3:1 мағлуб шуд.
Дастаи мунтахаби Кореяи Ҷанубӣ, ки соли равон дар бозиҳои ниҳоии Чемпионати Осиё( (U-16) ширкат хоҳад намуд, дар рақобати баробар дар дақиқаҳои поёнӣ тавонист ғалабаи худро ба даст биорад.
Голи дастаи мунтахаби мамлакатро Тоҳир Малодӯстов ба самар расонид. Натиҷаи вохӯрӣ то дақиқаи 76 1:1 буд .Ҳайати дастаи мунтахаби Тоҷикистон дар ин бозӣ чунин буд:
Далер Азизов, Ваҳдат Ханонов, Ҳувайдо Малиев, Манучеҳр Сафаров, Султоншо Мирзоев, Мубинҷон Муминов, Амир Иброҳимов, Шервони Мабатшоев, Фаридун Неъматов, Далер Ёдгоров, Аваз Қамчинов.
Дар дидори дуввуми рӯз тими мунтахаби Чин бар Туркманистон бо нишондоди 4:1 дастболо гардид.
Футболбозони мо дар силсилаи бозиҳои оянда  бо тимҳои мунтахаби наврасони Туркманистон (13 июл) ва Чин (15 июл) вориди майдон мешаванд. Вохӯриҳо ба таври даврӣ сурат мегиранд ва то 15 июл дар шаҳри Вайнан идома меёбанд.