Ғолибони даври аввали Фестивал-озмуни «Андалеб-2016» ба даври дуввум роҳхат мегиранд

Душанбе, 25.07.2016 /АМИТ «Ховар»/.  Пагоҳ, 26 июл соати 11:00 дар маҷлисгоҳи Вазорати фарҳанги Ҷумҳурии Тоҷикистон бо иштироки аъзои Кумитаи тадорукоти Фестивал-озмуни «Андалеб-2016», намояндагони шабакаҳои телевизион ва 10 шаҳру ноҳияҳои ҷумҳурӣ ҷаласаи корӣ доир мегардад.
Дар ҷаласа ба шаҳру ноҳияҳо, аз ҷумла Панҷакент, Кӯлоб, Вахш, Рӯшон, Роғун, Рӯдакӣ, Ҳисор, Файзобод, Тоҷикобод ва Синои шаҳри Душанбе, ки ғолиби даври авали Яестивал-озмуни «Андалеб-2016» гардидаанд, варақаҳои роҳхат барои иштирок дар даври дуввум супорида мешаванд.
Дар рафти ҷаласа масъалаи омодагӣ ва дар сатҳи баланди фарҳангӣ доир намудани барномаҳои Фестивал-озмуни «Андалеб-2016» мавриди баррасӣ қарор мегирад.
Даври ниҳоии Фестивал-озмуни ҷумҳуриявии телевизионии эҷодиёти халқ «Андалеб-2016» бахшида ба таҷлили ҷашни 25-солагии Истиқлолияти давлатии Ҷумҳурии Тоҷикистон аз 12 то 23 августи соли 2016 дар Филармонияи давлатии Тоҷикистон ба номи Акашариф Ҷӯраев баргузор мегардад.