Рашт: 11 нафар зан ҳамчун вакил дар Маҷлиси вакилони халқи ноҳия ҳуқуқи интихобкунандагонро ҳимоя мекунанд

Рашт, 30.07.2016. /АМИТ «Ховар»/. « Шумораи умумии занон дар ноҳияи Рашт то имрӯз 59 ҳазору 343 нафарро ташкил медиҳад, ки аз ин 31 ҳазору 110 нафарашон қувваи қобили меҳнат мебошанд. Аз ин шумора дар соҳаи тандурустӣ 387 нафар, маориф 314, фарҳанг 56 ва дар рушди соҳибкории хурду миёна 68 нафар зан кору фаъолият доранд»,- иттилоъ доданд аз Мақомоти иҷроияи ҳокимияти давлатии ноҳияи Рашт.
Ба иттилои манбаъ, дар корҳои мавсимии баҳорӣ беш аз 5906 нафар зан ба меҳнати фоиданоки ҷамъиятӣ ҷалб карда шудаанд. Теъдоди мутахассисони роҳбарикунанда аз ҳисоби занон дар ноҳия ба 146 нафар расидааст.
Аз ҷумла дар вазифаҳои муовини раиси ноҳия, ҷонишини раисони ҷамоатҳо, директорони муассисаҳои таълимӣ ва роҳбарони корхонаҳо фаъолият доранд. Инчунин 11 нафар зан ҳамчун вакил дар Маҷлиси вакилони халқи ноҳия ҳуқуқи интихобкунандагонро ҳимоя мекунанд.