С. Тағойзода: ба 2034 нафар шаҳрвандон аз ҷониби вазорат ҷиҳати машғул шудан ба фаъолияти соҳибкорӣ маблағ дода шуд

Душанбе, 22.07.2016. /АМИТ «Ховар»/.     «Дар давоми нимсолаи якуми соли ҷорӣ  аз ҷониби Вазорати меҳнат, муҳоҷират ва шуғли аҳолии Ҷумҳурии Тоҷикистон ҷиҳати машғул шудан ба фаъолияти соҳибкорӣ ба 2034 нафар шаҳрвандон ба андозаи 6 миллиону 38 ҳазору 90 сомонӣ, ё худ ба  ҳар як шаҳрванд ба андозаи 74,2 нишондиҳанда барои ҳисобҳо маблағ дода шуд»,- зикр намуд дар нишасти матбуотӣ Вазири меҳнат, муҳоҷират ва шуғли аҳолии Ҷумҳурии Тоҷикистон Сумангул Тағойзода.
Вазир ҳамчунин зикр кард, ки дар ҷумҳурӣ 61 муассисаи  низоми таҳсилоти ибтидоии касбӣ ва зиёда аз 70 маркази таълими калонсолон ва дигар марказҳои таълимии  мақомоти шуғли аҳолӣ фаъолият менамоянд.
Бояд гуфт, ки муассисаҳои мазкур мутахассисонро аз рӯи 14 самт, иқтисодиёт, техника ва технология, нақлиёт, техникаи  радиоэлектронӣ, энергетика, саноати кимиёвӣ, саноати сабук, саноати кӯҳӣ, меъморӣ ва сохтумон,  кишоварзӣ, металлургия,  телекоммуникатсия, сайёҳӣ ва меҳмондорӣ ва хизмати маишӣ-хӯрокӣ тайёр менамояд.