Қӯшунҳои сарҳадии КДАМ ҶТ: 83 нафар бо гумони кӯшиши убури ғайриқонунии сарҳади давлатӣ боздошт гардиданд

Душанбе, 21.07.16. /АМИТ «Ховар»/.   Хизматчиёни ҳарбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар нимсолаи аввали соли 2016 дар ҳамкорӣ бо дигар сохторҳои қудратӣ ва дар алоҳидагӣ ҳамагӣ 695 кг 732 гр маводи нашъаовар, аз ҷумла 11 кг 54 гр героин, 91 кг 448 гр афюн  ва  592 кг 744 гр маводи гурӯҳи каннабис,  490 дона  доруи мадҳушкунандаи экстаз  аз қочоқчиёни афғон  мусодира намуда,  363 494 бех  ниҳоли банги ҳиндиро сӯзонида нобуд карданд.
Тавре ба АМИТ «Ховар» Муҳаммад Улуғхоҷаев,  сардори маркази матбуоти Қӯшунҳои сарҳадии КДАМ Ҷумҳурии Тоҷикистон хабар дод,  дар ҷаласа оид ба натиҷаҳои хизматӣ-ҷангии Қӯшунҳои сарҳадии КДАМ ҶТ дар нимсолаи аввали соли 2016 зикр гардид, ки дар давраи ҳисоботӣ пешгирии кӯшиши вайронкунии сарҳади давлатӣ 83 нафар, вайронкунандагони низоми сарҳади давлатӣ 121 нафар, вайронкунандагони реҷаи  сарҳади давлатӣ  66 нафар,  вайронкунандагони сарҳади давлатӣ 151 нафар, аз ҷумла  шаҳрвандони Ҷумҳурии Исломии Афғонистон 108 нафар ва шаҳрвандони Ҷумҳурии Қирғизистон 14 нафар боздошт карда шудаанд.
Сарҳадчиён дар якҷоягӣ бо намояндагони сохторҳои қудратии ҷумҳурӣ  29  амалиёти махсус гузарониданд, ки 12-тои он бо кормандони КДАМ ҶТ мебошад.
Инчунин дар нимсолаи аввали соли 2016 дар сарҳади Тоҷикистону Афғонистон бо қочоқчиён ва вайронкунандагони хати сарҳади давлатӣ 15 маротиба задухӯрди мусаллаҳона ба вуқӯъ омадааст, кӯшиши убури хати сарҳад 7 маротиба пешгирӣ карда шуда, 13 нафар қочоқчиён дастгир шудаанд, 7 нафар вайронкунадагони хати сарҳад ва нашъаҷалобон нобуд карда шуда, 2 нафар захмдор шудааст.
Дар давраи ҳисоботӣ сарҳадчиёни тоҷик 19 яроқи оташфишон, 415 дона лавозимоти ҷангӣ, 297 кг маводи тарканда дарёфт ва мусодира намудаанд.