Дастаи мунтахаби футболи Тоҷикистон бо Фаластин имрӯз вориди рақобат мешавад

Душанбе, 6.09.2016 / АМИТ «Ховар» /. Дастаи мунтахаби Тоҷикистон баъди ба шаҳри Хиврон расидан (арабҳо онро Алхалил ном мебаранд), шоми дирӯз дар варзишгоҳи «Дуръа» машқҳои худро ба сомон расонд ва имрӯз дар соати 22:00 ба вақти Душанбе бо тими мунтахаби Фаластин дар як дидори дӯстона вориди рақобат мешавад.
Тавре сомонаи ФФТ хабар медиҳад, Ойбек Абдуғаффоров, намояндаи клуби футболи «Ҳосилот» бо сабаби таби баланд доштан дар машқҳо ширкат наварзид ва гумон аст, ки дар бозӣ ширкат намояд. Дар ин вохӯрӣ футболбозони мо бо пироҳанҳои сафед ҳунарнамоӣ хоҳанд кард. Ин масъала дар ҷаласаи роҳбарияти дастаҳо ҳалл гардид ва дар мавриди ивазкунии бозингарон дастаҳо ба тавофуқ расиданд, ки ҳар даста имкон дорад 6 нафар бозингарро дар ҷараёни вохӯрӣ иваз намояд.
Дар нишасти матбуотии пеш аз бозӣ сармураббии дастаи мунтахаби Тоҷикистон Ҳаким Фузайлов аз пазироии олии мизбонон изҳори ташаккур карда, гуфт:«Бозиҳои дастаи мунтахаби Фаластинро хеле зиёд тамошо кардем ва он як дастаеро мемонад, ки ҳам дар хати дифоъ ва ҳам дар ҳуҷум муқтадир аст. Мо бо ин тим бозие нишон хоҳем дод, ки табъи дили мухлисон бошад».
Капитани дастаи мунтахаби кишварамон Нуриддин Давронов низ дар тақвияти суханҳои сармураббӣ арз кард, ки «Ду сол қабл мо дар Бозиҳои Осиёӣ дар Гуанҷоуи Чин бо тими Фаластин вохӯрда будем ва он вақт тими мо бо натиҷаи 2 бар 1 мағлуб шуд. Ҳоло ҳайати дастаи мунтахаби кишварамон аз ҷавонон таркиб ёфтааст ва умед дорем, ки дар ин вохӯрӣ натиҷаи қонеъкунанда ба даст хоҳем овард».
Ба ҳамин тартиб, баъди бозии дӯстона дар Фаластин тибқи қарордод футболбозони ин кишвар барои бозии таҷрибавӣ ба Душанбе меоянд.