Эмомалӣ Раҳмон: «Дар 25 соли соҳибистиқлолӣ мардуми сарбаланди ноҳияи Спитамен ба дастовардҳои назаррас ноил гардиданд»

Душанбе, 13.09.2016 /АМИТ «Ховар»/. «Солҳои аввали истиқлолияти давлатӣ мардуми шарифи Тоҷикистон ба имтиҳони бисёр сангину вазнини таърих рӯ ба рӯ шуда, мушкилоти зиёдеро паси сар карданд ва маҳз бо сабру таҳаммул, саъю талоши ватандӯстона ва заҳмати фидокорона ба ин рӯзҳои неку воқеан идона мушарраф  гардиданд». Ин нуктаро имрӯз Асосгузори сулҳу  Ваҳдати миллӣ, Пешвои миллат, Президенти кишвар муҳтарам Эмомалӣ Раҳмон дар мулоқот бо роҳбарону фаъолон ва сокинони ноҳияи Спитамен иброз намуданд.
Пешвои миллат ҳамчунин иброз доштанд, ки соли равон, яъне соли таҷлили 25-умин солгарди Истиқлолияти давлатии Ҷумҳурии Тоҷикистон барои сокинони ноҳияи Спитамен боз бо як санаи муҳим  — 90-солагии таъсиси ноҳия хотирмон мебошад.
«Дар зарфи 25 соли соҳибистиқлолӣ мардуми сарбаланди ноҳияи Спитамен бо фаъолияти садоқатмандонаи худ дар соҳоти гуногун ба дастовардҳои назаррас ноил гардиданд»,- таъкид карданд Эмомалӣ Раҳмон ва илова намуданд, ки: «Ҷиҳати рушди соҳаи саноат дар ноҳия танҳо дар панҷ соли охир дар ноҳия 15 корхонаи нав ба фаъолият оғоз карда, истеҳсоли маҳсулоти саноатӣ бамаротиб афзоиш ёфтааст ».
Соҳаи кишоварзии ноҳия низ тараққӣ карда, дар давоми шаш соли охир афзоиши ҳаҷми истеҳсоли маҳсулоти кишоварзӣ якуним баробар зиёд шудааст.
Агар соли 2010 ҳаҷми умумии истеҳсоли маҳсулоти кишоварзӣ дар ноҳия 164 миллион сомониро ташкил карда бошад, пас соли гузашта кишоварзони ноҳия дар ҳаҷми 260 миллион сомонӣ маҳсулот истеҳсол кардаанд.