Мактаби № 6 деҳаи Шаҳрибарбари ҷамоати деҳоти Доғистон ба номи Ҷумъахон Ҳотамӣ гузошта шуд

Душанбе, 20.09.2016 /АМИТ «Ховар»/. 18 сентябри соли равон дар деҳаи Шаҳрибарбари ҷамоати деҳоти Доғистони ноҳияи Шамсиддин Шоҳини вилояти Хатлон маросими номгузории Муассисаи таҳсилоти миёнаи умумии № 6 ба номи муборизи роҳи озодиву ҳақиқат Ҷумъахон Ҳотамӣ баргузор гардид.
Чорабинии мазкур бо иштироки роҳбарияти мақомоти иҷроияи ҳокимияти давлатии ноҳия, намояндагони Вазорати корҳои дохилӣ, масъулини шуъбаҳои милитсияи ноҳияи Шамсиддин Шоҳин ва Муъминобод, наздикону пайвандони Ҷумъахон Ҳотамӣ, омӯзгорону хонандагони мактаби миёнаи № 6 ва сокинони деҳаи Шаҳрибарбар доир шуд.
Ҷумъахон Ҳотамӣ ҳамчун шарқшиноси маъруф ба ҳайси тарҷумон дар кишварҳои Ироқу Ливия ва Афғонистон фаъолият карда, соли 1993 ба ҳайси сардори маркази матбуоти Вазорати корҳои дохилии Тоҷикистон ба кор омад. Баъд аз фаъолияти чандинсола 4-уми июли соли 1999 дар шаҳри Душанбе аз тири нохалафон ҳалок гардид.