Дар ғарби Афғонистон ҷангиён 36 сокини осоиштаро ба қатл расонданд
![](https://khovar.tj/wp-content/uploads/2016/10/Afganistan-1.jpg)
Душанбе, 27.10.2016 /АМИТ «Ховар»/. Дар музофоти Гори Афғонистон рӯзи 25 октябр ҷангиён 36 сокини осоиштаро ба қатл расонданд. Дар ин бора агентии «Синхуа» бо такя ба гуфтаи волии музофоти мазкур хабар медиҳад.
«Пас аз оне, ки ҳамлаи ҷангиён ба атрофи шаҳри Фирӯзкӯҳ, маркази маъмурии музофоти Гор аз ҷониби неруҳои амният ва иттифоқчиёнашон рӯзи сешанбе хунсо карда шуд, онҳо қурбониёнро рабуданд. Дар натиҷаи бархӯрд якчанд ҷангиён маҳв ва маҷрӯҳ шуданд ва онҳо барои қасди бохти худро гирифтан худи ҳамон бегоҳ асиронро парронданд», — иттилоъ дод волии музофот Муҳаммад Носир Ҳазох.
Бино ба гуфтаи ӯ, мақомот тафтишотро оғоз кардаанд.
То ҳол ҳеҷ яке аз гурӯҳҳо масъулияти ин ҳамларо бар дӯш нагирифтааст. Вале мақомоти маҳаллӣ дар ин ҳодиса ҷангиёни марбут ба гурӯҳи террористии ба ном «Давлати исломӣ»-ро (ДИ, мамнӯъ дар Тоҷикистон) айбдор карданд.
Тибқи маълумоти охири Дафтари СММ дар Афғонистон, шурӯъ аз 1 январ то 30 сентябри соли равон беш аз 2560 сокини осоишта кушта шуда, зиёда аз 5830 тани дигар бар асари ҳаводиси марбут ба низоъ маҷрӯҳ гардидаанд.