Дар ҷумҳурӣ беш аз 500 корхонаи саноати хӯрокворӣ фаъоланд

Душанбе, 21.10.2016 /АМИТ «Ховар»/. Дар айни ҳол шумораи корхонаҳои саноати хӯроквории кишвар 564 ададро ташкил дода, дар таъмини бозори истеъмолии кишвар бо маҳсулоти ғизоии саноатӣ ва рушди иқтисодиёти ҷумҳурӣ саҳми назаррас доранд.
Тавре ки аз Вазорати саноат ва технологияҳои нави кишвар ба АМИТ «Ховар» иттилоъ доданд, ҳаҷми истеҳсоли маҳсулоти саноати хӯрокворӣ дар моҳҳои январ- сентябри соли 2016 — 2,4 миллиард сомониро ташкил дод, ки нисбат ба ҳамин давраи соли гузашта 131,1 миллион сомонӣ зиёд мебошад.
Дар зерсохтори Раёсати хӯроквории Вазорати саноат ва технологияҳои нави ҶТ 3 корхонаи воҳиди мустақили хоҷагидорӣ: КВД «Хӯрокворӣ», КВД «Саноати гӯшту шир» ва КВД «Ғалла» фаъолият мекунанд.
Дар 9 моҳи соли 2016 дар соҳа 34 корхонаю коргоҳи нав бо 569 ҷойи корӣ ба фаъолият шурӯъ намуданд. Корхонаҳои зертобеи Раёсати хӯроквории вазорат — КВД «Хӯрокворӣ», КВД «Гӯшту шир» ва КВД «Ғалла» дар ҳаҷми 492,4 миллион сомонӣ маҳсулот истеҳсол карданд, ки ин нисбат ба ҳамин давраи соли гузашта 74,8 миллион сомонӣ зиёд буда, суръати афзоиш 117,9%-ро ташкил дод.
Дар сохтори корхонаҳои воҳиди давлатӣ 13 соҳаи саноати хӯрокворӣ фаъолият мекунанд.