Кумаки техникии ҳукумати Финландия ба хоҷагиҳои деҳқонии ВМКБ

Хоруғ, 21.10.2016. /АМИТ «Ховар»/. Ҳукумати Финландия ба хоҷагиҳои деҳқонии ноҳияҳои Рӯшону Шуғнон ва Ишкошим чаҳор трактори тамғаи «ТС-400»-ро, ки ҳар кадоме 67 ҳазор доллар қимат доранд, кумак кард. Раҳбари хоҷагии деҳқонии деҳаи Савноби водии Бартанг Ислом Давлатмамадов гуфт, ки «бо ин тракторҳо на танҳо шудгор мекунем, балки метавонем ҳосили картошкаро ғундорем ва дигар амалиётро анҷом диҳем. То ба имрӯз заминҳоро бо барзагов шудгор менамудем ва дар ҷамъоварии ҳосил низ неруи ин ҳайвонотро  истифода мекардем. Соли гузашта сокинони деҳаи Савноб аз зарбаи зилзила осеби зиёд диданд. Баъди муваққатан кӯч бастанашон ба маркази ноҳия бештари ҳайвоноти  худро ба фурӯш гузоштанд. Аз ин рӯ ин кумаки техникӣ хеле саривақтист ва кори деҳқононро сабук месозад».

Ҳукумати Финландия тасмим гирифтааст, ки дар ду соли оянда  сокинони деҳоти дурдасти ноҳияи Мурғобро тавассути чоҳҳои амудӣ аз оби ошомиданӣ таъмин намояд.