Ошкоршавии 108 ҷиноят ва 4688 ҳуқуқвайронкунии маъмурӣ аз ҷониби дружиначиёни ихтиёрӣ

Душанбе, 21.10.2016 /АМИТ«Ховар»/. Дар ҷамъбасти фаъолияти нуҳмоҳаи дружиначиёни ихтиёрӣ маълум гардид, ки дружиначиён дар ҳамкорӣ бо кормандони мақомоти корҳои дохилӣ 108 ҷиноят ва 4688 ҳуқуқвайронкунии маъмуриро ошкор намуда, бо кумаки онҳо 11 нафар шахсони дар кофтуковбуда ёфта шудаанд.
Ҳамчунин бо иштироки фаъолонаи дружиначиёни ихтиёрӣ 382 ҳолати майдаавбошӣ, 644 ҳолати пайдо шудани шаҳрвандон дар ҳолати мастӣ дар ҷойҳои ҷамъиятӣ, 580 ҳолати оворагардӣ ва талбандагии шаҳрвандон, 47 ҳолати майдадуздӣ, 417 ҳолати вайрон намудани қоидаҳои ҳаракат дар роҳ, 1190 ҳолати риоя нашудани қоидаҳои истиқомат, 97 ҳолати фурӯши ғайриқонунии маводи сӯзишворӣ ва 1083 ҳуқуқвайронкунии дигар ошкор ва барои бартараф кардани онҳо тадбир андешида шудааст.
Тибқи иттилои ВКД, дружиначиёни ихтиёрӣ қариб дар ҳама чорабиниҳои оммавӣ дар таъминоти тартиботи ҷамъиятӣ ҳамроҳ бо кормандони мақомоти корҳои дохилӣ ҳиссаи сазовор мегузоранд.