СММ: «Ҷабҳат ан-Нусра» тарки Ҳалабро рад кард

Душанбе, 14.10.2016 / АМИТ «Ховар» /. Ҷангиёни гурӯҳи террористии «Ҷабҳат ан-Нусра» пешниҳоди СММ-ро дар бораи он, ки шаҳри Ҳалаби Сурияро бо кафолати дахлнопазирӣ тарк намуда, роҳи худро ба музофоти Идлиб идома диҳанд, рад карданд. Дар ин бора ИА «REGNUM» бо истинод аз суханони муовини фиристодаи махсуси СММ оид ба Сурия Рамзӣ Эзелдин Рамзӣ иттилоъ медиҳад.
Хотиррасон мешавем, ки қаблан намояндаи вижаи СММ оид ба Сурия Стаффан де Мистура 6 октябр изҳор дошт, ки ба ҷангиёни «Ҷабҳат ан-Нусра» пешниҳод менамояд, ки шаҳри Ҳалабро ба воситаи долонҳои бехатар тарк намоянд. Ӯ ҳатто омода буд, ки ҷангиёнро шахсан ҳамроҳӣ намояд. Де Мистура таъкид кард, ки тибқи сарчашмаҳои гуногун, дар Ҳалаб тақрибан 900 ҷангиёни «Ҷабҳат ан-Нусра» ва тақрибан ҳашт ҳазор ҷангиёни гурӯҳҳои гуногун аз «мухолифон» мутамарказ шудаанд.
Дар СММ таъкид намуданд, ки онҳо интизор доштанд ҷангиён тарки Ҳалабро рад мекунанд, вале ба ҳар ҳол дар созмони ҷаҳонӣ умедвор буданд, ки террористон розӣ мешаванд ва ин гоми онҳо барои гурӯҳҳои дигар намунаи мусбат хоҳад шуд.
Ёдовар мешавем, ки баъди чанд рӯзи созиши нопойдор дар охири сентябри соли равон муҳорибаҳо дар Ҳалаб дубора шиддат ёфтанд. Неруҳои ҳукуматӣ шаҳрро аз ҷангиён минтақа ба минтақа бармегардонанд. Набардҳо хеле тезу тунд буда, талафот аз ду ҷониб аст.