Бунёди бинои нав дар осоишгоҳи «Шифо» — и Вазорати корҳои дохилӣ дар деҳаи Гармчашмаи ноҳияи Ишкошим

Хоруғ, 09.11. 2016. /АМИТ «Ховар»/. Дар остонаи Рӯзи милитсияи тоҷик дар назди осоишгоҳи истироҳатию табобатии «Шифо», воқеъ дар деҳаи Гармчашмаи ноҳияи Ишкошим, мутааллиқ ба кормандони Вазорати корҳои дохилии ҷумҳурӣ боз як бинои замонавӣ мавриди баҳрабардорӣ қарор дода шуд. Бинои мазкур дорои 10 кати хоб аст. Сардори Раёсати Вазорати корҳои дохилӣ Абдулваҳҳоб Искандарзода гуфт, ки «ин осоишгоҳ то ба ҳол бештар аз 26 нафарро қабул карда метавонист ва ҳоло теъдоди он ба 36 нафар расонида шуд. Биноҳое, ки қаблан сохта шуда буднд, ба талаботи замони мусир ҷавобгӯ нестанд. Мо тасмим гирифтем, ки марҳила ба марҳила онҳоро аз нав бунёд кунем. Бо супориши Вазири корҳои дохилӣ соли равон барои ин осоишгоҳ як мошини ёрии таъҷилӣ ҷудо карда мешавад».
Яке аз собиқадорони мақомоти корҳои дохилӣ Абдумамад Назармамадов, ки наздики 30 соли ҳаёти худро ба таҳкими тартибу низом ва волоияти қонун дар ҷумҳурӣ бахшидааст, ба роҳбарияти Вазорати корҳои дохилии кишвар бо арзи сипос чунин баён дошт: «Дар ин осоишгоҳ ҳамаи шароит муҳайё карда шудааст. Ман дар ноҳияҳои мухталифи кишвар кор кардам. Дар ин ҷо бо чанд нафар ҳамкорони собиқи худ вохӯрдам ва хеле хушҳол шудам».
Осоишгоҳи истироҳатию табобатии Гармчашма яке аз маъруфтарин чашмаҳои шифобахши кишвар буда, ҳамасола аз минтақаҳои гуногуни ҷумҳурӣ ва берун аз он ҳазорон нафар барои табобат ва дамгирӣ ба ин ҷо меоянд. Ба гуфтаи мутахассисон, оби ин чашма барои табобати касалиҳои пӯст, дарди миёну по ва ором кардани асаб давои хуб мебошад.