Ҷавонони шаҳри Ваҳдат аз эълон гардидани «Соли 2017 -соли ҷавонон» сарфарозанд

ВАҲДАТ, 22.12.2016 /АМИТ «Ховар»/. Имрӯз сокинони шаҳри Ваҳдат тавассути шабакаҳои телевизион Паёми имсолаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар корхонаю муассисаҳо, марказҳои ҷамоатҳои шаҳраку деҳот ва чойхонаҳои ҷамъиятӣ тамошо намуданд. Дар ин бора ба хабарнигори АМИТ «Ховар» мудири бахши ҷавонон Маъруфҷон Азиззода иттилоъ дод.
Инчунин бо ибтикори бахши ҷавонон, варзиш ва сайёҳии шаҳр баъд аз анҷоми ироаи Паёми Пешвои миллат дар маркази шаҳр дар мавзӯи «Ҷавонон- пайрави Пешвои миллат» ҳамоиши тарғиботӣ баргузор гардид. Ҳамзамон дар назди қасри фарҳанги шаҳр барномаи консертии идона бо ҷалби васеи ҷавонон доир шуд.
«Мақсад аз баргузор гардидани ҳамоиши ҷавонони шаҳр- ин истиқбол гирифтани эълони «Соли 2017 -соли ҷавонон» буд, ки имрӯз зимни ироаи Паём аз ҷониби Сарвари давлат Эмомалӣ Раҳмон пешниҳод гардид. Ҳадафи пешниҳод-муттаҳидии насли ҷавон, мустаҳкам намудани риштаи дӯстӣ миёни ҷавонон ва дар якҷоягӣ мубориза бурдан бар зидди омилҳои номатлуби ҷомеа мебошад»,- гуфт Сафарбег Саидов, сармутахассиси бахши ҷавонони шаҳри Ваҳдат.