Ҷамшед Каримзода: «Соли 2016 пардохти музди меҳнат, нафақа, стипендия, ҳама намуди ҷубронпулиҳо ва кумакпулиҳо ба аҳолӣ таъмин гардид»

ДУШАНБЕ, 27.01.2017. /АМИТ Ховар/. Имрӯз дар нишасти матбуотии Вазорати молияи Ҷумҳурии Тоҷикистон Ҷамшед Каримзода, муовини якуми вазир ба хабарнигорон ҷамъбасти натиҷаҳои фаъолияти молиявӣ ва иҷрои Буҷети давлатии Ҷумҳурии Тоҷикистонро дар соли 2016 шарҳ дода, зикр кард, ки порсол новобаста аз таъсири омилҳои берунӣ рушди воқеии Маҷмӯи Маҳсулоти Дохилӣ нисбат ба соли 2015 0,9 банди фоиз афзоиш ёфта, ҳаҷми номиналии он ба 54, 4 миллиард сомонӣ баробар гардид, ки нисбат ба соли 2015 0,6 миллиард сомонӣ зиёд мебошад.
«Ҳаҷми умумии Буҷети давлатӣ ба маблағи 17, 5 миллиард сомонӣ ё ба андозаи 95,7 фоиз таъмин гардид, ки ин нисбат ба нақша 781, 2 миллион сомонӣ кам ва нисбат ба соли 2015 1422, 9 миллион сомонӣ зиёд мебошад.
Даромади буҷети ҷумҳуриявӣ дар ин давра ба андозаи 92,5 фоиз ё ба маблағи 7,3 миллиард сомонӣ таъмин гардид, ки ин нисбат ба нақшаи пешбинигардида 586,1 миллион сомонӣ кам мебошад.
Қисми даромади буҷетҳои маҳаллӣ аз ҳисоби сарчашмаҳои дохилӣ ба андозаи 97, 4 фоиз иҷро гардида, ба буҷет 4030, 4 миллион сомонӣ ворид шудааст, ки ин аз нақшаи пешбинишуда 107, 6 миллион сомонӣ кам мебошад»,- изҳор дошт Ҷамшед Каримзода.
Ҷамшед Каримзода ҳамчунин таъкид намуд, ки дар соли 2016 барои маблағгузории соҳаҳои иҷтимоӣ зиёда аз 8,9 милиард сомонӣ равона гардид, ки 48, 4 фоизи ҳаҷми умумии хароҷоти Буҷети давлатиро ташкил медиҳад. Дар доираи он маблағгузории музди меҳнат, нафақа, стипендия, ҳама намуди ҷубронпулиҳою кумакпулиҳо ба аҳолӣ таъмин гардид.