Баланд бардоштани сатҳи касбомўзӣ дар муассисаҳои таълимӣ-бардошт аз Паёми Пешвои миллат

ДУШАНБЕ, 27.01.2017 /АМИТ «Ховар»/. Имрўз, 27 январ дар Вазорати меҳнат, муҳоҷират ва шуғли аҳолии Ҷумҳурии Тоҷикистон нуктаҳои муҳими Паёми Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон Эмомалӣ Раҳмон ба Маҷлиси Олии Ҷумҳурии Тоҷикистон мавриди баррасӣ қарор дода шуданд.
Сардори Раёсати назорати умумии Прокуратураи генералии Ҷумҳурии Тоҷикистон Абдусамӣ Содиқзода Паёми Пешвои миллатро раҳнамо ва барномаи амал барои вазорату идораҳо, сохторҳои давлатию ҷамъиятӣ ва шаҳрвандони ҷумҳурӣ барои соли 2017 хонд.
«Дар Паёми имсолаи Пешвои миллат таъсиси ҳарчи бештари ҷойҳои нави корӣ, рушди ҳунарҳои мардумӣ, баланд бардоштани сатҳи касбомўзӣ дар муассисаҳои таълимӣ, ҷалби бештари занону ҷавонон ба омўзиши касбу ҳунарҳои ҷавобгў ба талаботи бозори меҳнат, масъалаҳои муҳим ва ҳалталаб муайян гардидаанд.
Бинобар ин, масъулини вазоратро зарур аст, ки барои сари вақт иҷро кардани дастуру супоришҳои Сарвари давлат тамоми тадбирҳои заруриро роҳандозӣ намоянд»,-илова намуд Абдусамӣ Содиқзода.
Зимни муҳокимаи масъала инчунин Прокурори калони Раёсати назорати умумии Прокуратураи генералии Ҷумҳурии Тоҷикистон — Усмоналӣ Холиқзода ва масъулини Вазорати меҳнат, муҳоҷират ва шуғли аҳолии Ҷумҳурии Тоҷикистон иштирок намуданд.