Мусобиқаи шоҳмот бо ширкати 100 шоҳмотбози наврас дар шаҳри Хоруғ

ХОРУҒ, 26.01.2017. /АМИТ «Ховар» /. Дар толори варзишии мактаб- литсеи Оғохон байни шоҳмотбозони наврас аз 26 мактаби таҳсилоти умумии шаҳри Хоруғ ва ноҳияи Шуғнон сабқат баргузор шуд. Сардовари мусобиқа Вафо Нурмамадов гуфт, ки дар марҳилаи аввал варзишгарони хурдсол дар таълимгоҳи худ бо ҳам рақобат мекунанд ва ғолибон барои ширкат ба ин мусобиқа роҳхат мегиранд.
«Аз соли 2010 бо иқдоми ширкати барқии «Помирэнерҷӣ» барои хонандагони синфҳои ибтидоии шаҳру навоҳии ВМКБ дарси шоҳмот роҳандозӣ намуда, ҳамасола синфхонаҳои шоҳмотро таъмир, асбобу анҷоми заруриро барои кӯдакон харид мекунем. Дар айни ҳол 1500 нафар хонандагони синфҳои ибтидоӣ дар ин дарсҳо ширкат намуда, маҳорати худро такмил медиҳанд»,-гуфт сардовар.
Вафо Нурмамадов гуфт, ки шоҳмот на танҳо тафаккури кӯдакону наврасонро ташаккул медиҳад, балки ба рафтору кирдор ва гуфторашон низ таъсири мусбат мерасонад. Онҳое ки дар ин дарсҳо ширкат меварзанд, ҳамеша оромиро дӯст медоранд, ҳушу ёдашон ба мутолиаи дастурамалҳои тахассусӣ ва бозиҳои интелектуалӣ банд мебошад.
Ғолибони сабқат бо туҳфаҳои пурарзиш ва асбобу анҷоми хониш қадрдонӣ шуданд.