Рустам Шоҳиён ҳолатҳои бар асари ғарқшавӣ ҳалок гаштани шаҳрвандонро ташвишовар хонд

ДУШАНБЕ, 19.01.2017. /АМИТ «Ховар»/. Дар Тоҷикистон шумораи нафароне, ки дар натиҷаи ғарқшавӣ ба ҳалокат расидаанд, кам гаштааст, вале ин ҳолатро роҳбарияти Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ҳамоно ташвишовар арзёбӣ менамояд.
Муовини аввали Раиси кумитаи мазкур Рустам Шоҳиён дар нишасти матбуотии имрӯза оид ба ин масъала изҳори нигаронӣ намуда, иброз дошт, ки қатъи назар аз санҷишҳои ҳамешагӣ миёни оммаи мардум корҳои фаҳмондадиҳӣ аз ҷониби кормандони кумита пайваста гузаронида мешаванд. Инчунин аз тариқи радио ва телевизион таблиғот бурда мешавад, вале мутаассифона, ҳанӯз ҳам зимни оббозӣ одамон қурбон мешаванд.
Ба иттилои Рустам Шоҳиён, бар асари риоя накардани қоидаҳои бехатарӣ ҳангоми оббозӣ дар давраи ҳисоботӣ 138 нафар (соли 2015- 183 нафар) ғарқ шуданд, ки бештари онҳоро одамони синни аз 17 боло ташкил медиҳанд.
«Сабаби афзудани ғарқшавиҳо беэҳтиётии падару модарон нисбат ба кӯдакон ва гармои сахти тобистони гузашта мебошад»,-зикр кард муовини аввали Раиси Кумита.
Дар баробари ин, соли гузашта кормандони Кумитаи ҳолатҳои фавқулода дар ташкил ва роҳандозии корҳои садамавиву наҷотдиҳӣ фаъол буда, мунтазам дар бартарафсозии оқибатҳои ҳолатҳои фавқулодаи табиию техногенӣ ва амалиёти наҷотдиҳӣ иштирок намуданд.
Дар натиҷа 132 нафарро (соли 2015- 90 нафар) наҷот доданд, ки аз ин 88 нафар афроде буданд, ки дар об ғарқ мешуданд.