ВКД: Занозании ҷавонон як куштаву як маҷрӯҳ барҷой гузошт

ДУШАНБЕ, 23.01.2017. /АМИТ «Ховар»/. Вазорати корҳои дохилии Ҷумҳурии Тоҷикистон аз ошкор гардидани ҳодисаи занозании ҷавонон хабар дод, ки дар натиҷаи ин ҳодиса як нафар кушта ва як нафар маҷрӯҳ гардидааст.
Тавре аз Вазорати корҳои дохилӣ ба АМИТ «Ховар» иттилоъ доданд, дар натиҷаи гузаронидани корҳои фаврӣ-ҷустуҷӯӣ аз ҷониби кормандони милитсия бо гумони содир намудани ҷинояти куштор марди 25-солаи сокини шаҳри Душанбе, ки қаблан бо моддаи 244 Кодекси ҷиноятии Ҷумҳурии Тоҷикистон ҳабс шудааст, дастгир карда шуд. Гумонбаршуда ҳамроҳи шарикаш марди 26-солаи сокини дигари шаҳри Душанбе дар кӯчаи Р.Карими ноҳияи Фирдавсӣ бо мардони 24 ва 28-солаи сокинони шаҳри Душанбе муноқиша ва ҷанҷол мекунанд.
«Зимни муноқиша марди 25-солаи гумонбаршуда бо корди дар дасташ буда, як маротиба ба қафаси синаи марди 28-сола ва як маротиба ба қисмати пойи марди 24-сола зада, аз ҷойи ҳодиса ғайб задааст. Дар натиҷа, марди 28-сола аз ҷароҳати вазнини бардоштааш дар ҷойи ҳодиса ба ҳалокат расида, марди 24-сола ҷароҳати ҷисмонӣ бардошта, дар беморхона бистарӣ гардидааст. Аз рӯи далели мазкур парвандаи ҷиноятӣ оғоз гардида, тафтишоти ҳодиса идома дорад»,- иттилоъ доданд аз Вазорати корҳои дохилӣ.